ପାଖ ମାଡ଼ିଲେ ନାହିଁ ସାହି ପଡ଼ିଶା, ଶବକୁ କାନ୍ଧ ଦେଲେ ୪ ସାମ୍ବାଦିକ

0

ଓଡ଼ିଶା ଫାଷ୍ଟ(ବ୍ୟୁରୋ): କରୋନାର କୋପ ଆଗରେ ହଜି ଯାଉଛି ମାନବିକତ। । ଏହି ମହାମାରୀ ଦିନକୁ ଦିନ ଭୟଙ୍କର ରୂପ ଧାରଣ କରୁଥିବା ବେଳେ ଲୋକଙ୍କ ମଧ୍ୟରେ ମଧ୍ୟ ତିକ୍ତତା ଓ ଘୃଣା ଭାବ ବଢ଼ିବାରେ ଲାଗିଛି। ଏପରିକି ଘଣ୍ଟା ଘଣ୍ଟା ଧରି ମୃତଦେହ ପଡ଼ି ରହିଥିଲେ ମଧ୍ୟ ତାକୁ ଉଠାଇବାକୁ କାନ୍ଧ ମିଳୁନି। ଏପରି ଏକ ହୃଦୟ ବିଦାରକ ଘଟଣା ଗଞ୍ଜାମ ଜିଲ୍ଲା ଶେରଗଡ ଅଞ୍ଚଳରେ ଦେଖିବାକୁ ମିଳିଛି। ଯେଉଁ ସମୟରେ ପାଖ ପଡ଼ୋଶୀ ଆହା ପଦେ କହିଲେ ନାହିଁ, ସେ ସମୟରେ  ଶବ ସତ୍କାର ନିମନ୍ତେ ଆଗେଇ ଆସିଲେ ୪ ସାମ୍ବାଦିକ। ଯେଉଁଥିପାଇଁ ଶେରଗଡ ଅଞ୍ଚଳରେ ସେମାନଙ୍କ ନିକଟକୁ ପ୍ରଶଂସାର ସୁଅ ଛୁଟୁଛି।

ଶେରଗଡ ଗ୍ରାମର ବଡ଼ଦାଣ୍ଡ ସାହି ବାସିନ୍ଦା ତଥା ପୂର୍ବତନ ପ୍ରଧାନ ଶିକ୍ଷକ ଶ୍ରୀ ପିତାମ୍ବର ପାଢ଼ୀଙ୍କର ଦୀର୍ଘ ୧୦/୧୫ ଦିନ ଧରି ଜ୍ୱର,  କାଶ  ଲାଗି ରହିଥିଲା।  ମଙ୍ଗଳବାର ରାତିରେ ତାଙ୍କର ମୃତ୍ୟୁ ହୋଇଥିଲା । ଶ୍ରୀ ପାଢ଼ୀ ଓ ତାଙ୍କ ପତ୍ନୀ ଘରେ ରହୁଥିବା ବେଳେ ତାଙ୍କର ଦୁଇ ପୁଅ ଅନ୍ୟ ରାଜ୍ୟରେ ରହୁଛନ୍ତି। କରୋନା କଟକଣା ଯୋଗୁ ସେମାନେ ଘରକୁ ଫେରିବା ସମ୍ଭବ ହୋଇପାରି ନ ଥିବା ବେଳେ ସ୍ୱାମୀଙ୍କ ଶବ ସତ୍କାର କିପରି କରିବେ ତାକୁ ନେଇ ପତ୍ନୀ ସମସ୍ତଙ୍କୁ ନେହୁରା ହେଲେ। ମାତ୍ର କରୋନା ଡରରେ ସାହି ପଡ଼ିଶା କେହି ଧରାଛୁଆଁ ଦେଲେନି। ଶେଷରେ ବିଳମ୍ବିତ  ରାତିରେ ଶେରଗଡ ସରପଞ୍ଚ ପ୍ରତିନିଧି ବାଲାଜୀ ପ୍ରଧାନ,  ସାମ୍ବାଦିକ ମେଘନାଦ ଦାସ, ଶଙ୍କର ପ୍ରସାଦ ପ୍ରଧାନ, ଅଜିତ କୁମାର ପଣ୍ଡା ପିତାମ୍ବରଙ୍କ ଘରେ ପହଞ୍ଚିଥିଲେ। ସେମାନେ କିଟ୍‌ ପିନ୍ଧି ଶବ ସତ୍କାର ପାଇଁ ଘରୋଇ ଆମ୍ବୁଲାନ୍ସ ଯୋଗେ ବ୍ରହ୍ମପୁର ପଠାଇଥିଲେ । ସେଠାରେ ପିତାମ୍ବରଙ୍କ ଶେଷକୃତ୍ୟ ସମ୍ପନ୍ନ ହୋଇଥିବା ଜଣାଯାଇଛି।

Leave A Reply

Your email address will not be published.