୫୬୮ କିଲୋ ୪୪୦ ଗ୍ରାମର ଗଞ୍ଜେଇ ଜବତ

0

ଓଡ଼ିଶା ଫାଷ୍ଟ(ବ୍ୟୁରୋ): କୋରାପୁଟ ଜିଲ୍ଲା ନନ୍ଦପୁର ପୁଲିସକୁ ଗତକାଲି ରାତିରେ ରାତ୍ର ପାଟ୍ରୋଲିଂ ସମୟରେ ଚୋରା ଗଞ୍ଜେଇ ଧରିବାରେ ଏକ ବଡ଼ ଧରଣର ସଫଳତା ମିଳିଥିବା ଜଣାଯାଇଛି।
ସୂଚନାଯୋଗ୍ୟ ଯେ, ଗତକାଲି ରାତିରେ ନନ୍ଦପୁର ଏସଡ଼ିପିଓ ସଞ୍ଜୟ କୁମାର ମହାପାତ୍ରଙ୍କ ନେତୃତ୍ୱରେ ଏସଆଇ ମାନସ କୁମାର ଭୋଇ ଏବଂ ଥାନା କର୍ମଚାରୀ ରାତ୍ର ପାଟ୍ରୋଲିଂ ପାଇଁ ରାତି ୮ ଟାରେ ବାହାରିଥିଲେ। ନନ୍ଦପୁର ବ୍ଲକ କାର୍ଯ୍ୟାଳୟ ସମ୍ମୁଖରେ ରାତ୍ର ୧୦.୪୦ ମିନିଟରେ ପାଡୁଆ ପଟୁ ଦ୍ରୁତ ଗତିରେ ଏକ ବାର ଚକିଆ ଟ୍ରକ (ରେଜିଷ୍ଟ୍ରସନ ନମ୍ବର ଏପି ୦୭ ଟି ଜେ ୩୧୭୭) ଆସୁଥିବା ବେଳେ ସନ୍ଦେହରେ ଅଟକାଇବା ପାଇଁ ଚେଷ୍ଟା କରାଯାଇଥିଲା। ଟ୍ରକକୁ ବ୍ଲକ କାର୍ଯ୍ୟାଳୟ ସମ୍ମୁଖରେ ପୁଲିସ ଅଟକାଇବା ଦେଖି ଡ୍ରାଇଭର ହଠାତ ଗାଡି ରଖିବା ସହ ଗାଡ଼ିରେ ଥିବା ଅନ୍ୟ ଜଣଙ୍କ ସହ ରାତିର ଅନ୍ଧାରର ସୁଯୋଗ ନେଇ ଫେରାର ହୋଇ ଯାଇଥିଲେ। ପୁଲିସ ଦୁଇ ଜଣଙ୍କୁ ଗୋଡ଼ାଇଥିବା ବେଳେ ରାତିର ଅନ୍ଧାରରେ ଫେରାର ହେବାକୁ ସକ୍ଷମ ହୋଇଥିଲେ ଟ୍ରକ ଚାଳକ।
ପୁଲିସ ସଙ୍ଗେ ସଙ୍ଗେ ଟ୍ରକ ନିକଟକୁ ଆସି ଯାଞ୍ଚ କରିବା ସମୟରେ ଉପରେ କଦଳୀ ଏବଂ ଭିତରେ ୨୭ ଟି ବସ୍ତାରେ ଗଞ୍ଜେଇ ଥିବା ଜାଣିବାକୁ ପାଇ ସଙ୍ଗେ ସଙ୍ଗେ ଟ୍ରକଟିକୁ ଥାନାକୁ ଆଣିଥିଲେ। ଆଜି ସ୍ଥାନୀୟ ତହସିଲଦାର ନରସିଂହ ଗାଦବାଙ୍କ ଉପସ୍ଥିତିରେ ଜବତ ଗଞ୍ଜେଇ ଓଜନ କରାଯାଇଥିବା ବେଳେ ୫୬୮ କିଲୋ ୪୪୦ ଗ୍ରାମ ହୋଇଥିଲା। ଗଞ୍ଜେଇ ସହ ବାର ଚକିଆ ଟ୍ରକ ଜବତ କରାଯିବା ସହ ନନ୍ଦପୁର ପୁଲିସ ଥାନାରେ କେସ ନମ୍ବର ୯୮/୨୦୨୦ ରୁଜୁ କରି ଘଟଣାର ତଦନ୍ତ କରାଯାଉଥିବା ତଦନ୍ତକାରୀ ଅଧିକାରୀ ଆଇଆଇସି କପିଳେଶ୍ୱର ବେହେରା ସୂଚନା ଦେଇଛନ୍ତି। ବାର ଚକିଆ ଟ୍ରକରେ କେଉଁ ସ୍ଥାନରୁ ଗଞ୍ଜେଇ ଭର୍ତ୍ତି କରାଗଲା ଏବଂ କେଉଁ ଠାକୁ ଯାଉଥିଲା ତାହାର ତଦନ୍ତ କରାଯିବ ବୋଲି ଏସଡ଼ିପିଓ ସଞ୍ଜୟ କୁମାର ମହାପାତ୍ର ସୂଚନା ଦେଇଛନ୍ତି।

Leave A Reply

Your email address will not be published.