ପ୍ରକାଶ ପାଇଲା ମାଟ୍ରିକ୍ ରେଜଲ୍ଟ, ପାସ୍‌ହାର ୭୮.୭୬ ପ୍ରତିଶତ

0

ଓଡ଼ିଶା ଫାଷ୍ଟ(ବ୍ୟୁରୋ): ପ୍ରକାଶ ପାଇଲା ଚଳିତବର୍ଷର ବର୍ଷର ମାଟ୍ରିକ୍ ରେଜଲ୍ଟ । ଭିଡିଓ ମାଧ୍ୟମରେ ପରୀକ୍ଷା ଫଳ ପ୍ରକାଶ କଲେ ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ । ଚଳିତବର୍ଷର ପାସ୍‌ହାର ୭୮.୭୬ ପ୍ରତିଶତ ରହିଛି । ମୋଟ୍ ୪ଲକ୍ଷ ୨୧ ହଜାର ୨୫୬ ଜଣ ଛାତ୍ରଛାତ୍ରୀ ପାସ୍ କରିଛନ୍ତି । ଚଳିତବର୍ଷ ଛାତ୍ରୀଙ୍କ ପାସ୍ ହାର ଅଧିକ ରହିଛି । ଗତବର୍ଷ ତୁଳନାରେ ଚଳିତ ବର୍ଷର ରେଜଲ୍ଟ ଭଲ ରହିଛି । ଛାତ୍ରୀଙ୍କ ପାସ୍ ହାର ୮୧.୯୮ ପ୍ରତିଶତ ଥିବା ବେଳେ ଛାତ୍ରଙ୍କ ପାସ୍ ହାର ୭୭.୦୮ ପ୍ରତିଶତ ରହିଛି । ଗ୍ରେଡ୍ -ଏ୧ରେ ୧୨୭୯ ଜଣ ଛାତ୍ରଛାତ୍ରୀ କୃତକାର୍ଯ୍ୟ ହୋଇଛନ୍ତି । ଗ୍ରେଡ୍-ଏ୨ରେ ୮୪୫୮, ଗ୍ରେଡ୍-ବି୧ରେ ୧୮୧୮୮, ଗ୍ରେଡ୍-ବି୨ରେ ୩୨୩୨୮, ଗ୍ରେଡ୍-ସି୧ରେ ୪୯୧୫୩ , ଗ୍ରେଡ୍-ଡି ୮୯୫୫୬ରେ, ଗ୍ରେଡ୍-ଇରେ ୨,୨୩,୧୯୫ ଜଣ ଛାତ୍ରଛାତ୍ରୀ ପାସ୍ କରିଛନ୍ତି ।

ଦିନ ସାଢେ ୧୧ଟାରୁ ୱେବସାଇଟରେ ରେଜଲ୍ଟ ଦେଖିପାରିବେ ଛାତ୍ରଛାତ୍ରୀ । ବୋର୍ଡର ୨ଟି ୱେବସାଇଟ୍ ଓ SMS ଜରିଆରେ ରେଜଲ୍ଟ ପାଇପାରିବେ ଛାତ୍ରଛାତ୍ରୀ । ଦୁଇଟି ଓ୍ବେବସାଇଟ୍ www.bseodisha.ac.in ଏବଂ www.bseodisha.nic.inରେ ରେଜଲ୍ଟ ଉପଲବ୍ଧ ହେବ । SMS ଜରିଆରେ ରେଜଲ୍ଟ ଜାଣିବା ପାଇଁ OR01 ଲେଖି ସ୍ପେଶ୍ ଦେଇ ନିଜ ରୋଲ୍ ନମ୍ଵର ଲେଖି 5676750କୁ ଏସ୍ଏମ୍ଏସ୍ କଲେ ରେଜଲ୍ଟ ଜାଣିପାରିବେ ଛାତ୍ରଛାତ୍ରୀ ।

ଚଳିତ ବର୍ଷ ରାଜ୍ୟର ପ୍ରାୟ ୫ ଲକ୍ଷ ୬୦ ହଜାର ପରୀକ୍ଷାର୍ଥୀ ମାଟ୍ରିକ୍ ପରୀକ୍ଷା ଦେଇଥିଲେ । ତେବେ କରୋନା ମହାମାରୀ ଯୋଗୁଁ ଅସ୍ବାଭାବିକ ସ୍ଥିତିରେ ଖାତା ଦେଖା ହୋଇଥିବାରୁ ସଠିକ୍ ମୂଲ୍ୟାୟନ ନେଇ ଆଶଙ୍କାରେ ଅଭିଭାବକ । କିନ୍ତୁ ରେଜଲ୍ଟକୁ ନେଇ ବେଶ୍ ଆଶାବାଦୀ ଥିଲେ ଛାତ୍ରଛାତ୍ରୀ ।

ତେବେ ଛାତ୍ରଛାତ୍ରୀମାନେ ରେଜଲ୍ଟ ସମ୍ବନ୍ଧୀୟ ତଥ୍ୟ ପାଇଁ ବୋର୍ଡ ପକ୍ଷରୁ କଣ୍ଟ୍ରୋଲ୍ ରୁମ୍ ଖୋଲାଯିବ । ଅଗଷ୍ଟ ୧୦ ତାରିଖ ପର୍ଯ୍ୟନ୍ତ ଦିନ ୧୧ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଏହି କଣ୍ଟ୍ରୋଲ ରୁମ୍ ଖୋଲା ରହିବ । ଏଥିପାଇଁ ୨ଟି ନମ୍ବର ଜାରି କରାଯାଇଛି । କରୋନା ପାଇଁ ମାନସିକ ବିଷାଦର ବାତାବରଣ ଥିବାରୁ, ଆଶାନୁରୂପ ଫଳ ହାସଲ କରିପାରିନଥିବା ଛାତ୍ରଛାତ୍ରୀଙ୍କ ପ୍ରତି ପରିବାର ସଦସ୍ୟ ସହାନୁଭୂତି ଦେଖାଇବା ପାଇଁ ଶିକ୍ଷାବିତ୍ ପରାମର୍ଶ ଦେଇଛନ୍ତି ।

Leave A Reply

Your email address will not be published.