ପୁରୀର ଗ୍ରାମ୍ୟ ଉନ୍ନୟନ ଅଧିନସ୍ଥ ସେତୁ ଓ ସଡକ ନିର୍ମାଣ କାର୍ଯ୍ୟର ସମୀକ୍ଷା କଲେ ସଞ୍ଜୟ ଦାସବର୍ମା

0

ଓଡ଼ିଶା ଫାଷ୍ଟ(ବ୍ୟୁରୋ): ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ଶ୍ରୀ ସଞ୍ଜୟ ଦାସବର୍ମା ବ୍ରହ୍ମଗିରି ନିର୍ବାଚନ ମଣ୍ଡଳୀର ଉନ୍ନୟନ ମୂଳକ କାର୍ଯ୍ୟର ସମୀକ୍ଷା କରିଛନ୍ତି । ସ୍ଥାନୀୟ ସ୍ବତନ୍ତ୍ର ପ୍ରଦକ୍ଷଣ ଗୃହ ସମ୍ମିଳନୀ କକ୍ଷରେ ଆୟୋଜିତ ସମୀକ୍ଷା ବୈଠକରେ ବିଜୁ ସେତୁ ଯୋଜନା ଅନ୍ତର୍ଗତ ୭ଟି ସେତୁ ତିନିକୁଦି, ଶିରୁଲି କରମଳା ନିକଟସ୍ଥ ଦୁଇଟି ସେତୁ, ପଥରପଦା, ନିଖିଳ ଗୋବିନ୍ଦପୁର, କୁଅପଦା, ଚାଷପଡା ନିକଟସ୍ଥ ସେତୁ ନିର୍ମାଣ ସଂପର୍କରେ ଆଲୋଚନା ହୋଇଛି । ଚାଷପଡା, କୁଅପଦା ଓ ଶିରୁଲି କରମଳା ନିକଟସ୍ଥ ସେତୁ କାମ ଖୁବ ଶୀଘ୍ର ଆରମ୍ଭ ହେବ । ଅନ୍ୟ ସେତୁ ଗୁଡିକ ନିର୍ମାଣ କାମକୁ ତ୍ବରାନ୍ବିତ କରିବା ସହ ମଞ୍ଜୁର ପାଣ୍ଠିର ପ୍ରଭାବୀ ପରିଚାଳନା ଉପରେ ଶ୍ରୀ ଦାସବର୍ମା ଗୁରୁତ୍ବାରୋପ କରିଛନ୍ତି ।

ସେହିଭଳି ବାରମ୍ବାର ଅବଗତ କରାଇବା ପରେ ଠିକ୍ ସମୟରେ କାମ ଶେଷ କରିବାରେ ଅବହେଳା କଲେ ସଂପୃକ୍ତ ଠିକାଦାରି ସଂସ୍ଥା ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ଓ କେତେକ ସଂସ୍ଥାକୁ କାରଣ ଦର୍ଶାଅ ନୋଟିସ ଜାରି କରାଯାଇଥିବା ଗ୍ରାମ୍ୟ ଉନ୍ନୟନ ନିର୍ବାହୀ ଯନ୍ତ୍ରୀ ଶ୍ରୀ ରାମପ୍ରସାଦ ଆଚାର୍ଯ୍ୟ ଜଣେଇଥିଲେ । ସେହିଭଳି ପ୍ରଧାନମନ୍ତ୍ରୀ ଗ୍ରାମ୍ୟ ସଡକ ଯୋଜନା ଅଧିନସ୍ଥ ୧୫ଟି ସ୍ଥାନରେ ୨୮ କୋଟି ୩୪ ଲକ୍ଷ ଟଙ୍କା ବିନିମୟରେ ୬୫ କିଲୋମିଟର ଦୈଘ୍ୟ ରାସ୍ତା ନିର୍ମାଣ କରାଯାଉଛି । ଅନ୍ୟପକ୍ଷରେ ମୁଖ୍ୟମନ୍ତ୍ରୀ ସଡକ ଯୋଜନା ଅଧିନରେ ତିନୋଟି ସ୍ଥାନରେ ଏକ କୋଟି ୪୫ ଲକ୍ଷ ଟଙ୍କା ବିନିମୟରେ ୫ କିଲୋମିଟର ରାସ୍ତା ନିର୍ମାଣ କରାଯାଉଛି । ରାସ୍ତା ନିର୍ମାଣ କାମ ଖୁବଶୀଘ୍ର ଶେଷ କରିବାକୁ ଶ୍ରୀ ଦାସବର୍ମା ନିର୍ଦ୍ଦେଶ ଦେଇଛନ୍ତି ।

ସେହିପରି ମୁଖ୍ୟମନ୍ତ୍ରୀ ସଡକ ଯୋଜନା ଅଧିନରେ ବାଲିହରଚଣ୍ଡି ଠାରୁ ମୋଟୋ ଦେଇ ଆଦର୍ଶ ବିଦ୍ୟାଳୟ ପର୍ଯ୍ୟନ୍ତ ରାସ୍ତା ତିଆରି ଖୁବଶୀଘ୍ର ଆରମ୍ଭ ହେବ । କୃଷ୍ଣପ୍ରସାଦ ବ୍ଲକର କେତେକ ଗ୍ରାମ୍ୟ ସଡକ ତିଆରି ଉପରେ ମଧ୍ୟ ଆଲୋଚନା ହୋଇଛି । ଏପରିକି ବୃହତ ଜଳ ଯୋଗାଣ ପ୍ରକଳ୍ପ ନିମନ୍ତେ ରାସ୍ତା ପାର୍ଶ୍ବରେ ପାଇପ ବିଛାଇବା ବେଳେ ରାସ୍ତାର ସ୍ଥାୟୀତ୍ବ ଉପରେ ଗୁରୁତ୍ବ ନଦେଇ ରାସ୍ତା ଖୋଳାଯାଉଥିବା ନେଇ ବୈଠକରେ ଉଦବେଗ ପ୍ରକାଶ ପାଇଛି । ଏଥିପ୍ରତି ଦୃଷ୍ଟି ଦେବା ସହ ବିହିତ ପଦକ୍ଷେପ ଗ୍ରହଣ କରିବାକୁ ପାନୀୟ ଜଳ ଯୋଗାଣ ବିଭାଗ ସର୍ବୋଚ ଯନ୍ତ୍ରୀଙ୍କୁ ଅବଗତ କରାଯିବ । ଉକ୍ତ ବୈଠକରେ ଅନ୍ୟମାନଙ୍କ ମଧ୍ୟରେ ଉପ ନିର୍ବାହୀ ଯନ୍ତ୍ରୀ ଶ୍ରୀ ଶ୍ରୀବତ୍ସ କୁମାର ଦାସ, ସହକାରୀ ନିର୍ବାହୀ ଯନ୍ତ୍ରୀ ଶ୍ରୀ ସଙ୍ଖାଳି ବେହେରା, ସହକାରୀ ଯନ୍ତ୍ରୀ ଶ୍ରୀ ସୁରେନ୍ଦ୍ର କୁମାର ସିଂ, ଶ୍ରୀ ସରୋଜ ପଣ୍ଡା, ଶ୍ରୀ ରାଜକିଶୋର ପାଲ ପ୍ରମୁଖ ଉପସ୍ଥିତ ଥିଲେ ।

Leave A Reply

Your email address will not be published.